|
今早七時十五分，準時集合，吹大北風，溫度又低過10度，好凍。早餐後，到街市買餌，紅鬆成160/斤，花竹更要280，好貴！
八時十五分，早禾坑上艇，本來想出長短咀捕赤立，不過風太大，艇家建議釣內海人工珊瑚礁位。十分鐘到達第一個位落錨
，釣了一會，就由我以一條手板澳洲黃腳立開齋，以為有個好開始，誰知除艇家釣上一條或外，眾人就在刺骨的寒風下，死磨爛磨到轉位，第二個位更差，一口都無
，手都凍到全無感覺。
到第三個位落錨，艇家話測魚機顯示有好多魚，話口未完，他就連起兩條芝麻班，亞峻再慢慢起多條大種芝麻班
，啊胡話有斤半。啊胡用花竹走了一口，因為條魚不夠五斤太細，吞不下隻蝦，艇家再起多一條芝麻斑後，就食飯。
之後，魚收口，艇家話有好多魚但不開口，無計，虛火一場。下午二時，轉位，艇家發現一個新礁位，就地落錨開工
，他說應該無人釣過，又話有好多魚，我一落餌就有魚試餌，不過好精口，含住餌不拉絲走，一抽即中，好片得，好好玩，上水前見一片紅色，以為赤立,原來係紅魚一條。啊胡話過三斤喎~
跟著又靜，又虛火，其實艇家都好盡力，魚不開口都無辦法。轉最後一個位，我釣兩條或，艇家再起五條或後收工
。
總魚獲：─
紅魚一條
芝麻斑四條
黃腳仔一條
或八條(除最大一條比亞峻外,全比艇家)
|
